“Nga bregu i liqenit të Shkodrës përgjatë kufirit malazezo-shqiptar deri mbi kanionin piktoresk të lumit Cem në veri shtrihet Hoti. Për ata që nuk e njohin këtë pjesë të Malësisë së Madhe (Malësisë së Mbishkodrës) dua të theksoj se kjo krahinë s’ka të bëjë vetëm me një fshat. Në kuptim më të gjerë është trevë që përfshin nëntë fshatra: Traboini i Moçëm (ndryshe quhet edhe Traboini i Sipërm ose Rranxa e Rrasës), Bardhaj, Nabomi, Helmica, Skorraqi, Spija ( që të gjitha përbëjnë Traboinin), pastaj Drumja e Poshtme, Drumja e Epërme - Bozhaj dhe Ploça, si dhe katundet fushore: Vuksanlekaj, Dreshaj, Nënhelm dhe Sukruq”.

Prej vitesh,në Mal të Zi, në kuadrin e mëkëmbjes së gazetarisë e të mediave në gjuhën shqipe, ka bërë emër dhe është shquar gazetari Gjekë Gjonaj, autor reportazhesh në Radion e Televizionin e Malit të Zi, si dhe i shkrimeve të shumta me karakter publicistik, historik, kulturor dhe etnografik e turistik për trevat e Malësisë së Madhe, pjesa e mbetur përtej kufijve shqiptarë,duke bashkëpunuar sidomos me gazetën “Koha javore” në Podgoricë , “Koha jonë” në Tiranë dhe “ Zëri” në Prishtinë.